Nu ozat divššu
Go skihppát, loavkidat iežat dahje dárbbašat dearvvašvuođa ráđi lea deaŧalaš ahte don dieđát gos ozat divššu. De sáhtát oažžut veahki jođáneappot. Jus lea heakkaheahti galggat álo riŋget 112.
1177
Webbsiiddus 1177.se gávdnojit dieđut dearvvašvuođas, dávddain ja oktavuođadieđut dearvvašvuođavuostáiváldimiin.
Go čálihat sisa sáhtát:
- lohkat iežat journála
- várret áiggi ja gieđahallat dikšobálvalusa
- dahkat iežá áššiid mat gusket du dikšui
Sáhtátnai riŋget 1177 buohccedivššoráđđemii. Telefovdnii vástidit birra jándora.
Dearvvašvuođaguovddáš
Dearvvašvuođaguovddáš lea dávjá vuosttaš sadji gos ozat divššu. Dat lea rabas árggaid ja máŋga dearvvašvuođaguovddážat fállet maiddái digitálalaš divššodeami.
Don sáhtát ohcat divššu man dearvvašvuođaguovddážis háliidat. It dárbbaš mannat dan dearvvašvuođaguovddážii gosa leat čálihuvvon.
Farggavuostáiváldin
Farggavuostáiváldin lea rabas eahkediid ja vahkkoloahpaid. Das sáhtát oažžut veahki heajus veadjimii mainna ii sáhte vuordit dassážiigo dearvvašvuođaguovddáš rahpá árgga.
Gávnnat dieđuid farggavuostáiváldimis du dearvvašvuođaguovddáža webbsiiddus.
Heahtevuostáiváldin
Jus leat bahuid skibas dahje leat loavkidan iežat ja dárbbašat divššu dakkaviđi galggat mannat heahtevuostáiváldimii. Heahtevuostáváldimis oažžu dat geas lea stuorimus dárbu ovddimusat divššu.
Buohcceviessu
Don dárbbašat remissa go galggat oažžut divššu buohcceviesus. Remissa lea dieđáhus mii vuoseha ahte don dárbbašat divššu erenoamáš doaktáris dahje vuostáiváldimis. Sáhttá ovdamearka dihte leahkit doavttir dearvvašvuođaguovddážis gii čállá remissa. Doavttir sádde remissa njuolga ossodahkii, ja maŋŋil de oaččut áiggi. Muhtun ossodagaide sáhtát ieš čállit remissa.
Loga eanet remissas (ruoŧagiel siidui)
Maid čálihuvvon ovtta dearvvašvuođaguovddážii mearkkaša?
Čálihuvvon mearkkaša ahte leat válljen guđe dearvvašvuođaguovddážii don háliidat gullot. Dávjjimusat lea dasa gosa ovddimusat válddat oktavuođa go dárbbašat áiggi diŋgot. Ieš válljet guđe dearvvašvuođaguovddážii háliidat čálihit iežat ja sáhtát molsut goas háliidat. Váldde oktavuođa dearvvašvuođaguovddážiin gosa háliidat gullot de sii veahkehit du.