Potilasmaksoja Västra Götalandissa
Kun sie käyt terhveys- ja siukkahoijossa, sie maksat potilasmakson. Kuinka paljon sie maksat, riippuu siittä minkä tyypin hoitoa sie saat.
Sie maksat saman makson riippumatta siittä, jos sie saat hoitoa meiltä eli privaatilta hoijonantajalta– jos hoijonantajalla on sopimus Västra Götalandsregionin kans.
Alle 20-vuotihaat lapset ja nuoret ei maksa terhveys- ja siukkahoijosta. Siittä päivästä lähtien, kun sie täytät 85, avoin terhveys- ja siukkahoito on ilmhainen. Sie kuitenkin saatat joutua maksamhaan vissistä vaksiinista, intyykistä ja terhveyskontrollista.
Jätetty käynti eli myöhäinen perruutus
Jos sie et pysty tulemhaan varathuun aikhaan, sie tarttet varata uuven aijan eli perruuttaa varatun aijan viimisthään 24 tiimaa ennen vierailua. Jos sie et tehe sitä, sie häyt maksaa korvauksen. Kostanus on sama kun potilasmakso. Jos potilasmakso on alle 100 kruunua eli jos käynti olisi muuten ollu ilmhainen, sillon sie maksat 100 kruunua. Tämä koskee kans lapsia ja nuoria alle 20-vuotta, yli 85-vuotihaita sekä henkilöitä joila on vapakortti.
Korkeakostanussuoja
Korkeakostanussuoja tarkottaa, ette sie et tartte maksaa enämpää kuin vissi summa vuoen aikana. Kun sie olet maksanu summan, sie saat vapakortin. Vapakortti merkittee, ette sie et jouvu maksamhaan ennää potilasmaksoja loppuvuoen aikana.
On olemassa eri korkeakostanussuojia:
- avohoito (hoito ilman ette sie jäät sairalhaan)
- yöpymishoito (hoito kun sie jäät yöksi sairalhaan)
- reseptimetesiiniä.
Hammashoito
Hammashoijola on erinlaiset kostanukset kun muu terhveyven- ja siukkahoijola ja se on usseimiten tyyrhiimpi.
Makso
Sie voit vaphaasti maksaa kortila vierailun yhteyvessä. Se on kans maholista maksaa puhtaala rahala. Jos sie et maksa varsin, lähätethään lasku sinun kotiia.
Lissää tietoja
Täältä sie voit lukea lissää kostanuksista ja korkeakostanussuojasta (sivu on ruottiks)
Avohoito ja yöpymishoito – mikäs ero niissä on?
Avohoito tarkottaa sitä, ette sie saat hoitoa ilman yöpymistä, esimerkiks terhveyskeskuksessa eli vasthaanotossa.
Yöpymishoito tarkottaa sitä, että sinun otethaan sairalhaan ja sie jäät hoitoa varten yhen eli useaman yön.